O Tala a Iosefa Samita o le Uluai Faaaliga

Faatulagaga o fuaiupu, tulafono e taialaina ai le gagana, sipelaga, faasa’oga, ma le faamataitusi lapopoa ua faalaugatasia. Mo le mauaina o ata ma faamaumauga atoa o tala muamua o le Ulua’i Faaaliga, tagai i leTala Patino o le Uluai Faaaliga a Iosefa Samita o le Atua.

 

E Tusa ma le Taimi o le Taumafanafana 1832 Talafaasolopito

Pe tusa o le 12 o [o’u] tausaga, sa oo ina matuai faagaeetia ai lo’u mafaufau e uiga i atugaluga sili ona taua mo le manuia o lo’u agaga e faavavau, lea na taitai atu ai a’u e suesue i tusitusiga paia—i le talitonu ai, e pei na aoaoina ai a’u, o loo i ai le afioga a le Atua, ma sa faatatau ai ia te a’u. O lo’u iloa lelei ma le va lalata ai ma i latou o isi talitonuga ese, na taitai atu ai a’u i le maofa tele, aua na ou iloa ai e latou te le’i teuteuina le latou galuega i se savali paia ma ni talanoaga faaleatua e ogatusa ma lea na ou mauaina o loo i lena tusi mamalu.    O lenei mea sa tiga ai lo’u agaga. 

O lea, mai tausaga sefululua i le sefululima na ou mafaufau loloto ai i le tele o mea i lo’u loto e faatatau i le tulaga o le lalolagi o le tagata, o finauga ma fevaevaeaiga, o le amioleaga ma mea inosia, ma le pogisa lea na faatumulia ai mafaufau o tagata. Na amata ona atugalu tele lo’u mafaufau, aua ua tausalaina a’u i a’u agasala, ma i le suesue ai i tusitusiga paia na ou maua ai e faapea e le’i o mai tagata i le Alii ae ua latou liliuese mai le faatuatua moni ma ola, ma ua leai se faatasiga po o se talitonuga lea na faavae i luga o le talalelei a Iesu Keriso e pei ona faamauina i totonu o le Feagaiga Fou. Na ou lagona le faanoanoa mo a’u lava agasala ma mo agasala a le lalolagi, aua sa ou aoaoina i tusitusiga paia o le Atua e tutusa lava o ananafi, o le aso, ma le faavavau, ma e le faailoga tagata o Ia, aua o Ia o le Atua. 

Aua sa ou vaavaai atu i le la, o le susulu mamalu o le lalolagi, faapea foi le masina, o taavili i lo latou mamalu i le lagi; faapea foi fetu o loo susulu i o latou ala; ma faapea foi le lalolagi o loo ou tu ai; o manu foi i le fanua ma manulele i le lagi ma i’a i le sami; faapea foi le tagata o loo fesavalia’i i luga o le laueleele i le mamalu ma i le malosiaga o le matagofie, o le mana lea [o le Atua] ma le malamalama i le puleaina o mea ua matua maoae ma ofoofogia, i le faatusa o Le sa foafoaina i latou. Ma ina ua ou mafaufau i nei mea, sa alaga lo’u loto, “Ua lelei le faapea mai o le tagata poto, ‘Ua fai ifo le tagata valea i lona loto, e leai se Atua.’” Sa alaga lo’u loto, “O mea uma nei ua molimau ai ma mua’i tala mai ai le silisiliese o le mana ma le soifua ai o le Atua, o se tamalii o le e faia tulafono ma fofogaina atu ma noatia mea uma i o latou noataga, o le e faatumulia le faavavau, o le sa i ai ma o le a i ai pea lava mai le vavau e oo i le faavavau.” Ma na ou manatunatu i nei mea uma ma e faapea o lena e na te saili i ai e tapuai ia te ia, e tatau ona tapuai ia te ia i le agaga ma le faamaoni.

O lea, sa ou tagi atu ai i le Alii mo le alofa tunoa, aua sa leai se isi na mafai ona ou alu i ai e maua mai ai le alofa tunoa. Ma sa faafofogaina e le Alii la’u tagi i le togavao, ma a’o i ai i le agaga o le valaau atu i le Alii, i le sefuluono o tausaga o lo’u olaga, sa alu ifo mai luga se malamalama faaniutu e sili atu i le pupula o le la i le aoauli, ma nofo i o’u  luga. Sa faatumulia a’u i le agaga o le Atua ma sa tatala e le Alii ia le lagi i o’u  luga ma sa ou vaai i le Alii. 

Ma na Ia fetalai mai ia te a’u, e faapea, “Iosefa, lou atalii e, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau. Faauta, o le taimi nei ua taoto le lalolagi i le agasala, ma ua leai se tasi o faia le lelei, e leai, e leai lava se tasi. Ua latou faasaga ese mai le talalelei ma ua le tausia a’u poloaiga. Ua latou faalatalata mai ia te a’u i o latou laugutu, a o o latou loto ua mamao mai ia te a’u. Ma ua mumū lo’u ita e faasaga i e nonofo i le lalolagi, ia asia i latou e tusa ma lo latou amioleaga ma ia faataunuu ai mea na tautalagia e fofoga o perofeta ma aposetolo. Aua faauta, e pei ona tusia e uiga ia te a’u, ou te vave sau, i ao, e ofu i le mamalu o lo’u Tama.”

Na faatumulia lo’u agaga i le fiafia, ma mo le tele o aso, na mafai ona ou olioli ma le fiafia tele. Sa faatasi mai le Alii ia te au, ae e le mafai ona ou maua se tasi e talitonu i faaaliga faalelagi. E ui i lea, sa ou mafaufau loloto i nei mea i lou loto.

 

Api Talaaga, 9–11 Novema 1835

I le fiafia ai i lo’u mafaufau e faatatau i le mataupu faalelotu, ma le vaai ai i faatulagaga eseese o loo aoaoina ai fanau a tagata, sa ou le iloa po o ai e sa’o ae po o ai e sese. Ma i le manatunatu ai i le mea e sili ona taua e faapea e tatau ona ou sa’o i mataupu lea e aofia ai taunuuga e faavavau, o lea i le lē mautonu ai i lo’u mafaufau, na ou tuumuli ai i le togavao filemu ma ifo atu ai i luma o le Alii, i le i ai o se lagona o le iloaina e faapea sa ia faapea mai (pe afai e moni le Tusi Paia), “Ole atu, ona foaina mai ai lea ia te outou; tu’itu’i atu ona toina ai lea ia te outou; saili, ona outou maua ai lea” ma le toe faapea, “A e afai ua leai se poto i so outou, ina ole atu ia i le Atua, o lē e foai tele mai i tagata uma ma le lē toe ta’uta’ua.”   

O le mea sa sili ona ou manao i ai i lea taimi o ni faamatalaga, ma i le i ai o se naunautaiga mautu ina ia ou mauaina, sa ou valaau atu ai i le Alii mo le taimi muamua i le nofoaga ua ta’ua i luga.  Po o ni isi upu, na le manuia lau taumafaiga e tatalo, o lo’u laulaufaiva ua foliga ua fula i totonu o lo’u gutu, ua le mafai ai ona ou tautala. Sa ou faalogo i se pisa mai i o’u tua, e pei o se tagata o loo savali agai mai ia te a’u. Sa ou toe taumafai e tatalo ae ua le mafai. O le leo o le tagata o loo savali sa foliga ua lata mai. Sa ou tu a'e i luga i o’u vae ma vaavaai solo ae sa le vaaia se tagata po o se mea lea na mafua ai le leo o se tagata o loo savali. 

Sa ou toe to'otuli. Sa matala lo’u gutu ma sa sa’oloto lo’u laulaufaiva, ma sa ou valaau atu i le Alii i le tatalo malosi. Na faaali mai se afi faaniutu i luga a’e o lo’u ulu. Sa nofo i ou luga ma faatumulia ai a’u i le olioli e lē mafaamatalaina. Na faaali mai se peresona i le totonugalemu o le susulu faaniutu, lea sa salalau solo, ae sa leai se mea na faaleagaina. E lei pine ae faaali mai se isi peresona e faapei o le na muamua. Sa Ia fai mai ia te a’u, “Ua faamagaloina au agasala.” Sa Ia molimau mai ia te a’u o Iesu Keriso o le Alo o le Atua. Ma sa ou vaai i le tele o agelu i lenei faaaliga. Sa pe a ma le sefulufa o’u tausaga i le taimi na ou maua ai lenei uluai fesootaiga.

 

E Tusa ma le Taimi o le 1838 Talafaasolopito

Iosefa Samita—Talafaasolopito 1:5–20

 

“Talafaasolopito o le Ekalesia,” 1 Mati, 1842 (Tusi a Wentworth)

Ina ua tusa ma le sefulufa tausaga le matua, na amata ai ona ou mafaufau i le taua o le saunia mo se tulaga i le lumanai, ma i le suesue e uiga i le ata o le faaolataga, na ou iloa ai le va tele i lagona tau talitonuga faalelotu; afai ou te alu i le tasi faapotopotoga, ua latou faasino a’u i se tasi fuafuaga, ma le isi i se isi, ua faasino mai e i latou taitoatasi i lana ia lava talitonuga o se vaaiga o le atoatoa. I le manatu ai e le sa’o i latou uma, ma e le mafai ona avea le Atua ma faapogai o le tele o le lē mautonu, na ou naunau ai e suesue mae’ae’a lelei le mataupu, i le talitonu ai e faapea, afai e i ai se ekalesia a le Atua, e le vaevaeina i ni vaega, ma afai na te a’oa’o le tasi faapotopotoga e tapuai i se tasi ala, ma taitai i se faatulagaga e tasi o sauniga, o le a ia lē aoao atu ni isi mataupu faavae e feteena’i. I le talitonu ai i afioga a le Atua, sa ou talitonu ai i le folafolaga a Iakopo; “A e a fai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.”

Sa ou alu atu i se nofoaga faalilolilo i se togavao ma amata ona valaau atu i le Alii. A o [o’u] auai ma le faatauanau i le olega, sa aveesea lo’u mafaufau mai mea na faapea ona siomia ai a’u, ma sa fusifusia au i se faaaliga faalelagi ma vaai i le mamalu o ni tagata e toalua e foliga tutusa lava i vaaiga ma faatusa, ua siomia e se malamalama pupula lea na punitia ai le la i le aoauli. Sa laua fetalai mai ia te a’u o tapuaiga faalelotu uma ua talitonu i aoaoga faavae sese, ma e leai se tasi o i latou na faamaonia e le Atua e faapea o lana ekalesia ma le malo. Ma sa faatonuina manino a’u e “aua le mulimuli atu ia te i latou,” ma i le taimi lava lea na maua ai se folafolaga o le a faaalia mai ia te a’u le atoatoa o le talalelei i se taimi o le lumanai .